Minister Presidènt Schotte a gaña durante diskurso ofisial dia di Bandera

                                                                                                                      Curaçao,  2-7-2012

Ku hopi tristesa mi ta haña mi obligá pa deklará ku nos promé minister Gerrit Schotte a gaña durante diskurso nashonal riba dia di bandera. E deklarashon di Gerrit Schotte esta ku Churandy mester kore pa Ulanda pasobra gobièrnu anterior no a logra partisipashon olímpiko promé ku 101010 ta un mentira fragante.

Ta bon konosí ku Kòrsou a pèrdè miembresia di komité olímpiko internashonal na momentu ku Antia ku tabata miembro mas ku 75 anan a disparsé. P’esei ni Kòrsou ni Sint Maarten no tin miembresia olímpiko mas. Esei ta motibu ku Churandy no por partisipá pa Olimpiada na London 2012 na nòmber di Kòrsou i a skohe pa partisipá bou di bandera di Ulanda.

Echo ta ku e gobièrnu di PAR den Antia a pone un fondo di 350.000 disponibel pa prepará Churandy na 2008 pa weganan di Beijing. Ademas di 15.000 pa prepará e team di estafèt.  Na aña 2012 bou di promé minister Schotte, deportistanan mester a buska spònser serka empresa priva pa por bai weganan olímpiko na London.  

Den un karta ofisial di IOC ku ta komité olímpiko internashonal fecha 2007, nan ta konfirmá e echo aki bisando ku niun di e sinku islanan ku ta forma parti di Antia no por haña rekonosimentu di nan komité olímpiko tanten ku nan no ta independiente: ‘’Under the rules of the Olympic Charter currently in force- the IOC- could not recognize any new National Olympic Committee on any of the five Islands currently forming the Netherlands Antilles, as long as they would not meet the status and condition of “’independent State recognized by the international community” (weta kopia di karta apendix 1).

Den un di dos karta fecha 23 di ougùstùs 2010, IOC ta rekonfirmá e mesun posishon di 2007 bisando meskos ku nan a bisa den nan karta di 2007. ( weta karta apèndiks 2).

E kartanan aki NAOC a manda pa koalishon di sr. Schotte for di 1 di sèptèmber 2010. Pues Gerrit Schotte konosé e kartanan aki i nan kontenido hopi bon. Pues ta un bèrgwensa ku un promé minister ta para gaña pueblo di Kòrsou den un diskurso nashonal riba dia di bandera. Un falta di rèspèt kompleto pa pueblo, pa nos bandera i tambe pa e funshon di promé minister. Un biaha mas Gerrit Schotte a proba ku e no ta apto pa e funshon di promé minister. Kòrsou no meresé un promé minister mentiroso.

Omayra Leeflang

Eks minister di enseñansa i deporte