Diesdos medida di kuratela riba Gobièrnu di Schotte pa Kòrsou na plaka chikí

                                                                                                                                     Kòrsou, 19-7-2012

Gobièrnu di Reino a pone Kòrsou bou di kuratela i enbes ku promé minister Gerrit Schotte bin splika na plaka chikí kiko esaki ta nifiká i kon ta saka Kòrsou for di e bèrgwensa doloroso, e ta keda ketu i atendé ku su hòbi ku ta pènel di solo. Un pueblo informá no por keda manipulá. P’esei akibou un bista di e diesdos medida di kuratela na plaka chikí.

Gobièrnu di Kòrsou mester:

1.      Paga debenan entre 10 di òktober 2010 pa 31 di desèmber 2010, ku ta 98 mion, ku entradanan di e aña ei.

2.      Gerrit Schotte mes presentá algun medida for di 2011 ku lo baha gastu ku 55 mion den salubridat. E no tin mag di pone e montante aki den presupuesto tanten ku e no a pasa e leinan i e leinan drenta na vigor. Meskos ta konta pa ganashi di kompanianan di pueblo mester paga na gobièrnu. Gobièrnu tin mag di konta e plaka ei den su presupuesto solamente ora gobièrnu realmente haña e plaka

3.      Tanten ku gobièrnu no introdusí e medidanan ku e mes a anunsiá for di 2011 ku ta spar 55 mion, gobièrnu mes mester bini ku solushon kon e ta spar 55 mion promé ku 1 di sèptèmber 2012.

4.      Gobièrnu di promé minister Schotte no por fia plaka pa ningun proyekto.

5.      Gerrit Schotte no por fia plaka pa konstrukshon di e hospital nobo tanten ku e no introdusí e medidanan ku e mes a anunsiá den salubridat. Tambe Gerrit Schotte mester sòru pa e tarifanan di salubridat por kubri e gastunan di hospital.

6.      Gerrit Schotte mester sòru pa CFT tur luna haña tur e resibunan di banko di gobièrnu pa kontrolá kiko a drenta komo plaka i kiko gobièrnu a paga

7.      Gobièrnu no tin mag di bini ku proyektonan nobo ku no ta para riba presupuesto i ku ta kosta plaka 

8.      No por tuma mas personal den gobièrnu

9.      Tur desishon ku tin influensha riba gastu di personal mester keda publiká mensualmente

10.   1 di sèptèmber 2012 Gerrit Schotte mester entrega un plan kon ta bai hasi e kompanianan di gobièrnu entre otro Aqualectra finansieramente salu.

11.   For di 24 di ougùstùs, gobièrnu di Schotte mester reportá kon leu e maneho finansiero ta via CFT tur luna na konseho di minister di reino

12.    Gerrit Schotte mester kumpli ku tur konseho anterior ku CFT a duna.

Omayra V.E. Leeflang

Produktor di Ata Palabra