’Parlamentario di koalishon ta aprobá labamentu di plaka?’’
Willemstad, 8 mart 2012
Pa un mayoria di Parlamento, e dokumentonan ku a Sali den publisidat ku ta proba depósitonan di sentenáres riba kuentanan bankario di sr. Gerrit Schotte, no ta problema tampoko pa sr. Gerrit Schotte. Miéntras e depósitonan di sentenáres di plaka kèsh ta un forma perfekto pa labamentu di plaka.
For di e dokumentonan ku a Sali publiká por dedusí ku sr. Gerrit Schotte tabata depositá montantenan di 30.000 i 50.000 kèsh riba su kuenta bankario sin por indiká for di unda el a saka e plakanan ei. Ademas informashonnan ta mustra ku sr. Schotte tabata risibí míles i míles for di e komersiante Vanndis. Ta parse ku e guera kontra Funmiles di pòmp di gasolinnan di Asogas ta un payback.
Aparentemente ku a depósitonan di mas ku 80.000 kèsh riba kuenta di banko no ta motibu di prekupashon ni pa sr. Schotte ni pa Parlamento.
Kermen minister Presidente por sigui haña plaka for di fuentenan dudoso i depositá nan riba kuentanan di banko. Kisas awor riba kuentanan di banko den eksterior? Ki siguridat nos tin ku no tin plaka den tas di minister Presidente pa depositá riba kuenta di banko ora e bai riba su kuantioso biahanan sin meta? Kisas esaki ta motibu ku ministernan di gabinete Schotte no ke pasa screening na Hato?
Konklushon ta ku nos Parlamento i sr. Schotte ta duna un mensahe na komunidat ku ta kompletamente korekto pa haña monton di plaka for di fuentenan dudoso i kana ku maletin ku míles di biyete pa depositá riba banko. Kermen fásilmente por haña plaka for di benta di droga, hòrtamentu i otro fuentenan dudoso i hiba nan banko. No ta importá si banko raportá esaki na MOT, pasobra tòg nada no ta Sali afó i hasta bo por bira mandatario i minister Presidente den nos pais.
Esaki ta e ehèmpel ku nos hubentut ta haña. Pasobra si minister Presidente di nos pais por hasié anto un mayoria di Parlamento aprob’é, e komportashon aki a bira normal den nos pais.
Labadónan di plaka lo ta kontentu ku e notisia aki i internashonalmente nos lo sigui ku e nòmber di paraiso pa laba plaka. Ademas tin tambe e ‘’inkeer regeling’’ den kua e gobièrnu di sr. Gerrit Schotte ta duna oportunidat na personanan ku a skonde plaka den eksterior pa nan por hinka e plaka na Kòrsou anto haña un redukshon di belasting.
Awor ku un mayoria di Parlamento a aprobá ku e posibilidat pa labamentu plaka no ta problema, palabra ta na pueblo pa indiká ku ta esaki ta e pais outónomo den reino ku nos a skohe pe.
Ban lanta nos bos i rechasá degenerashon di Kòrsou tur kamida i na tur forma posibel. Ami a kuminsa.
Omayra V. E. Leeflang
Produktor di Ata Palabra
Geen opmerkingen:
Een reactie posten